自以為是既外國人

外國人教育，強調獨立思考。每逢見到D外國人指出亞洲人行差踏錯，都好似未見先審覺得一定係亞洲人錯咁。呢Ｄ祟洋光環同埋一味仰慕人，真係描繪出亞洲人溫馴的一面。你去外國玩，如果外國人就黎話你做錯，一般亞洲人既性格，好容易就會龜縮。

係紐西蘭，我同同學放學經過地盤工地。工地棟起左一塊塊鐵板去圍住工地，阻攔途人走入工地範圍。於是我地行出馬路。點知個地盤工人就黎話我地唔應該行出馬路邊緣，應該沿住佢設條路，兜地盤工地外圍行出去。我有個同學，就叫佢周瑜啦。佢女仔黎，言行舉止都好禮貌，但就係有時太禮貌，係呢D情況搞到大伙兒理虧。勁蛇龜果下令人側目。

地盤工人好兇咁斥責我地。於是我話：「喂大佬，你應該棟個牌出黎，指示人點行。」個工人見我地亞洲人溫馴掛，好戰咁話：「我地一早放左個指示板係果度」。佢一指—嘩，大佬，九公里咁遠，搵鬼睇到。但周瑜已經馬上超級蛇龜，立刻話：「我地既錯。(My bad)」。果下我真下，正所謂輸人唔事陣，你有理無理向人認衰仔，想兜都兜唔到。有時我真係好忍受唔到人，係又認錯，唔係又認錯。

做人要有底線。我地一班同學去第個城市玩，坐巴士。上巴士之前要排隊。架車一黎，我捷足先登已經排到第二個位。排我前面有個洋女子，有理無理已經上左車。我叫齊我8個同學，叫佢地一齊上車。因為我手上拎住既係俾8個人入座既登車券。我見司機係度安排D人放行李，就叫我D同學上左車坐住先。

就係呢個時候，後面兩個洋人好心心不憤。佢話：「你可能唔知登車程序。你要等個司機檢查左你張登車券先可以上車囉。」我心諗，個洋妹一支箭沖上去果陣唔見你講。我話：「但佢（洋女子）已經上左去。」佢話：「佢上去唔代表咁樣係做得岩。」好。程序上既野我犯左慣例，我跟番。我叫番哂我D同學落黎。

但跟住佢唔妥既其實係另一樣野。佢唔鋸我一條友，排左隊伍第二位，但係就班哂8個人過來。我想問，如果係一對夫妻排隊，個老公排住隊，老婆去廁所，個老婆返番過黎，佢有冇權去跟番佢老公一齊上車呢？果兩個洋人當下係憑感覺討厭我地八個人一齊上車。但係個原則唔係取決於有幾多個人上車啵，兩個又好，八個又好，登車券上面寫左8個人，就係8個人一齊上車。唔通你拎住一個人既登車券，我話你整係上半身可以上，下半身要等埋後面果個人上左先可以上？

不過你可能會話，登車券只係訂明8個人均可以係車上佔一席位。但佢無話當其中一個人排左隊，就等於佢代替8個人拎到揀位置既優先權。咁呢樣野，佢又冇諗到咁深入。如果佢有諗到點反駁我，我倒會欣賞佢。弊就弊左，佢地連自己個立論都唔清楚。憑感指控我地8條友湧上車欠公德心，但係佢講唔出錯個地方係邊。就係呢種無力感。好多人連對錯都分唔清。但係西方人，有理無理扮左岩先，亞洲人？有理冇理認左錯先。做人唔可以未見官，先自動投降懺悔認罪。但轉過頭來又要埋怨投訴，呢D叫做懦夫囉。道歉唔係大哂，唔據理力爭就係戇居，人地或者會可憐你，但係絕對唔會尊重你囉。